KINGUAASSIUUTIT ATORNERAT PILLUGU ATUARTITSINEQ QANOQ ILIORNIKKUT TAMANUT NUANNERSUMIK MISIGISAQARFIUSINNAAVA?
Kinguaassiuutit atornerat pillugu atuartinneqarneq meeqqanut inuusuttuaqqanullu unammillernarsinnaavoq. Immikkoortumi uani sungiusaatit pingasut, atuartitsinermi atorneqarsinnaasut aammalu atuartitsinermi inimik toqqissisimaffiusumik pilersitsisinnaasut saqqummiunneqarput.
Atuartut atuartinneqarnerminni toqqissisimanngikkunik peqataalluarnissartik imaluunniit apeqquteqarnissartik ajornartissinnaavaat aammalu illaruaatigineqarnissartik ernummatigisinnaallugu. Ilinniartitsisup atuartut ikiorlugit toqqissisimanartumik tatigeqatigiinnermillu pilersitseqataaffigisinnaappagit sammisamut tunngatillugu peqataanissaat alapernaannissaallu ammaasseqataaffigissavaa.
ATUARTITSISUP AKISUSSAAFFIA
Toqqissisimanartunik sinaakkusiinissaq ilinniartitsisup akisussaaffigaa. Atuartut misilittagaat isumaallu assigiinngitsut pillugit ataqqeqatigiinnissaat pingaaruteqarpoq. Qinngasaarerpalaartumik nikassaarpalaartumillu pissusilersortoqarnersoq eqqumaffiginissaa aammalu taamaattoqarpat iliuuseqarfiginissaa pingaarluinnarpoq.
Atuartitsinermi qinngasaarineq ilaatigut atuartut toqqissisimannginnerinik peqquteqarsinnaavoq, taamaattumillu quiasaarneq illersuutigilersarlugu. Ilinniartitsisutut nikaginnippalaartunik oqaaseqartoqartillugu imaluunniit atuartut imminnut illaatigalutik pinerini qisuariarnissaq pingaaruteqarpoq, taamatuttaaq tamarmik tikilluaqqusaasutut misigalutik peqataasinnaanissaat pillugit atuartut oqaloqatiginissaat pingaarluinnarluni.
KILLILIINISSAMUT SAKKUSSAT
Toqqissisimanartumik atuartitsinissamut atuartut nuannisarlutik misilittakkaminnik eqqartuilinnginnerini aallarniutaalluarsinnaavoq oqaloqatigeqqaassallugit isumaliutigilluaqqaassagaallu suut atuaqatiminnut tusartikkusunnerlugit. Namminermummi tunngasumik oqaatigisaqartoorsimagaanni kingorna peqqissimisoqarsinnaasarmat.
Taamaattumik innersuunnarpoq isumaqatigiinnissaq, atuartitsinermi namminermut tunngavallaanik oqaatigisaqannginnissaq, meeqqalli inuusuttullu pillugit ataatsimut isigalugu oqaloqatigiinnissaq. Aamma ilinnut ilinniartitsisumut tamanna atuuppoq. Naak nammineq inuunermi misilittakkanik oqaluttuarnissaq ajornanngitsutut isigineqarsinnaagaluartoq, tamanna sapinngisamik pinaveersaartittariaqarpoq.
Aammali pingaaruteqarpoq atuartitsisup atuartut imminnut tunngasunik avitseqateqarusuppata atuartitsinerup kingorna saaffigisinnaagaanni paasitissagai. Taamaalillutit atuartunut apeqquteqarusuttunut matumik ammaasoqarsinnaavutit.
TOQQISSISIMANNGINNEQ
Atuartut ilaannut kinguaassiutit atornerat pillugu atuartitsinerup suussusianik aammalu susoqalerneranik ilisimasaqannginneq peqqutigalugu toqqissisimannginneq misigisinnaavaat. Tamanna ersarissumik atuartitsinerup sumorpiaq tunnganissaanik nassuiaateqarnikkut pinaveersaartinneqarsinnaavoq.
Aamma atuartut peqatigalugit atuartitsinerup ingerlanissaanut ersarissunik isumaqatigiissusiortoqarsinnaavoq. Sammisat ilaanni atuartumit kinguaassiuutitigut atornerlunneqarsimasumit imaluunniit kannguttaatsuliorfigineqarsimasumit qisuariartoqarsinnaanera nalaanneqarsinnaavoq. Soorlu sammisat killissanut aammalu atoqatigiinnermut tunngassuteqarsimappata. Taamaattoqartillugulu iliuuseqarnissaq atuartullu qisuariaateqartup oqaloqatigilluarnissaa kaammattuuttumik ikiorneqarnissaa pingaaruteqarpoq.
Atuartut akornanni ilisimariikkamik aammalu nalunaarutigineqareersimasumik atornerlunneqarsimasumik peqataasoqartillugu eqqummaariffiginissaa ikorfartornissaalu pisariaqarpoq. Pingaaruteqarpoq qisuariarsinnaanerup nalinginnaasuunera atuartumut paasitissallugu, aamma atornerlunneqarneq qangali pisimagaluarpalluunniit. Atuartup misigisimasani pillugu ikorfartorneqarnissani pisariaqartinneraa misissoruk. Atuartoq atornerlunneqarsimanerminik. siullermeerluni oqaluttuaruni taamatut oqaluttuarnera pitsaasuusoq paasitinneqassaaq, taassumalu kingorna atuarfiuppisortaanut suleriusissatut pilersaarummik tusarniaasoqassaaq.