KINGUAASSIUTIT ATORNERAT PILLUGU
ATUARTITSINEQ QANOQ ILIORNIKKUT TAMANUT NUANNERSUMIK MISIGISAQARFIUSINNAAVA?
Kinguaassiutit atornerat pillugu atuartitsinermi toqqissisimanartunik sinaakkuteqartitsinissaq pingaaruteqarpoq. Atuartut toqqissisimanngikkunik atuartinneqarnerminni peqataalluarnissartik imaluunniit apeqquteqarnissartik ajornartissinnaavaat, soorlu illaruaatigineqarnissartik imaluunniit imminnut kanngusutsinnissartik ernummatigisinnaallugu. Ilinniartitsisup atuartut ikiorlugit toqqissisimanartumik tatigeqatigiinnermillu pilersitseqataaffigisinnaappagit sammisamut tunngatillugu peqataanissaat alapernaannissaallu ammaasseqataaffigissavaa.
ATUARTITSISUP AKISUSSAAFFIA
Toqqissisimanartunik sinaakkuteqarnissaq atuartitsisup akisussaaffigaa. Misilittakkat isummallu assigiinngitsut ataqqineqartinneqarneri misigissallugit atuartunut pingaaruteqarpoq. Qinngasaarerpalaartumik nikassaarpalaartumillu pissusilersortoqannginnissaanut nakkutilliinissaq aammalu taamaattoqarpat iliuuseqarfiginissai pingaarluinnarpoq. Soorlu assersuutigalugu nikaginnippalaartumik imaluunniit isorinnippalaartumik suiaassuseq, timi aammalu atoqatigiinnermut tunngasinnaasunik oqaaseqartoqarneratigut. Atuartitsisutut nikaginnippalaartunik oqaaseqartoqartillugu imaluunniit atuartut imminnut illaatigalutik pinerini qisuariarnissaq pingaaruteqarpoq, taamatuttaaq tamarmik tikilluaqqusaasutut misigalutik peqataasinnaanissaat pillugit atuartunik oqaloqateqarnissaa pingaarluinnarluni.
KILLILIINISSAMUT SAKKUSSAT
Toqqissisimanartumik ilinniartitsisoqassatillugu atuartut nuannisarlutik misilittakkaminnik eqqartuilinnginnerini aallarniutaalluarsinnaavoq oqaloqatigeqqaassallugit isumaliutigilluaqqaassagaallu suut atuaqatiminnut tusar tikkusunnerlugit. Namminermummi tunngasumik oqaatigisaqartoorsimagaanni kingorna peqqissimisoqarsinnaasarmat. Taamatuttaaq atuartitsisup sapinngisamik nammineq misilittakkani isiginnittariaasinilu aallaavigalugit oqaaseqannginnissaa pingaaruteqarpoq.
Oqimaaqatigiissinniarneri taakkua ajornakusoorsinnaagaluarpoq, sammisamummi attuumassuteqarluarsinnaagaluarmata, ilaannili ilinniartitsisumut atuartumullu killissamik qaangiiffiusinnaasarlutik. Aammali pingaaruteqarpoq atuartitsisup atuartut imminnut tunngasunik avitseqateqarusuppata atuartitsinerup kingorna saaffigisinnaagaanni paasitissagai.
TOQQISSISIMANNGINNEQ
Atuartut ilaannut kinguaassiutit atornerat pillugu atuartitsinerup suussusianik aammalu susoqalerneranik ilisimasaqannginneq peqqutigalugu toqqissisimannginneq misigisinnaavaat. Tamanna ersarissumik atuartitsinerup sumorpiaq tunnganissaanik nassuiaateqarnikkut pinaveersaartinneqarsinnaavoq. Aamma atuartut peqatigalugit atuartitsinerup ingerlanissaanut ersarissunik isumaqatigiissusiortoqarsinnaavoq
Sammisat ilaanni atuartumit kinguaassiutitigut atornerlunneqarsimasumit imaluunniit kannguttaatsuliorfigineqarsimasumit qisuariartoqarsinnaanera nalaanneqarsin naavoq. Soorlu sammisat killissanut aammalu atoqatigiinnermut tunngassuteqarsimappata. Taamaattoqartillugulu iliuuseqarnissaq atuartullu qisuariaateqartup oqaloqatigilluarnissaa eqqortumillu ikiorneqarnissaa isumagissallugu pingaaruteqarpoq. Atuartut ilaannik ilisimariikkamik aammalu nalunaarutigineqareersimasumik atornerlunneqarsimasumik peqataasoqartillugu taassuma eqqummaariffiginissaa ikorfartornissaalu pisariaqarpoq. Qisuariarsinnaanerup nalinginnaasuunera, aamma atornerlunneqarneq qangali pisimagaluarpalluunniit, atuartumut paasitissallugu pingaaruteqarpoq. Atuartup misigisimasani pillugu ikorfartorneqarnissani pisariaqartinneraa misissoruk. Atuartoq atornerlunneqarsimanerminik siullermeerluni oqaluttuaruni taamatut oqaluttuarnera pitsaasuusoq paasitinneqassaaq, taassumalu kingorna atuarfiup pisortaanut suleriusissatut pilersaarummik tusarniaasoqassaaq.
Atortussiat
Atorsussiat imaraat videot aamma sammisasanut assigiinngitsunut ilinniartitsisunut ilitsersuutit/suliassanik nassuiaatit kiisalu sammisasanut assigiinngitsunut suliassat anillatsitassat.
Atortussianut videot
